Os Patexeiros no programa Ribeiras da TVG
O pasado domingo, Os Patexeiros fomos coprotagonistas do último programa desta tempada de Ribeiras, que se emite pola TVG.
O programa estaba adicado ás ribeiras de Betanzos e de Cedeira.
En Betanzos estiveron con dous dos nosos socios, Javier Naveira, e Rafa Lage, que, como moitos saberedes, embarcáronse nun gran proxecto de reflotar, arranxar e alistar para navegar con pasaxe o Novo Rumbo, un barco de máis de 17 metros que se atopaba afundido no Río Mandeo.
Grazas ás nocións de carpintaría de ribeira, que aprenderon no Curso de carpintaría que organizamos, e á sua vontade e capacidade resolutiva, xa levan moi adiantados os traballos. Eu cada vez que os vexo traballar, recórdanme a McGiver, aquel persoaxe da serie de televisión que cunha grapa, un clip e unha caixa de mistos era capaz de construir unha central térmica.
Logo foron ata o porto de Lorbé e alí estiveron co mestre carpinteiro, José Manuel Gómez Porto, o noso Pepe de Lorbé e posteriormente achegáronse ó noso local no Porto de Lorbé e estivemos conversando un pouquiño e logo embarcamos nunha gamela para achegarnos á Balbina, onde tamén lles explicamos o noso proxecto.
Tamén foi un inmenso pracer, compartir este episodio cuns dos membros do grupo de música tradicional Os Cempés, que dende Cedeira nos contaba a súa estreita relación co mar.
Se non pudéchedes ver o programa este domingo, tédelo xa na TV á carta da TVG neste link:
Comentarios
Publicar un comentario
Fainos teu comentario aquí ou envíanos un correo a patexeiros@hotmail.com